USAPANG PAG-IBIG

USAPANG PAG-IBIG

Hahaha!

Nakakatawa at nakakatuwa talagang pag-usapan paminsan-minsan ang usapang pag-ibig.

Kasi ang totoo, habang nagkaka-edad ang isang tao, ang pananaw niya tungkol sa pag-ibig ay nagkaka-edad na rin.

Noong bata ka pa, kapag nabigo ka sa pag-ibig, iniiyak mo to ng iniiyak hanggang mabasa ang unan mo (base on my experience, haha)

Pag nagka-edad ka na (este nagka-edad na si pag-ibig) di ka na ganoon kaemotero-ra. Makakayanan mo na itong ngitian o tawanan. Di ba?

Pero isa sa da-best na katangian ng pag- ibig ay MATIYAGA. Kahit ang pinakamamahal mong kaibigan ay parang ayaw na sayo, aminin mo na kasi – maghihintay ka pa ding bumalik siya kahit umabot pa siguro ng forever.

Ganyan ang Diyos magmahal. Punung-puno ng pagtatiyaga. Ang sweet no? aye!

Siya nga pala, may SWEET LETTER ang BEST FRIEND ko PARA SAYO. Oo PARA SAYO. Ito o, basahin mo… ang sweet.

NAMI-MISS NA KITA

I

Natatandaan mo pa ba

Sana natatandaan mo pa

Noong unang araw na ako ay kinatagpo mo

Malaking tulong kasi ito

Para maalala mo ang pinagsamahan natin.

II

Noong araw na ‘yan

Hindi ako nahiyang ipagtapat sa’yo

Ang tunay kong nararamdaman

Minahal na kita noon pa

Kahit hindi mo pa ako nakikilala.

III

Sa sobrang pag-ibig ko sa’yo

Iniwan ko ang langit

Para makasama kita sa lupa

Ang totoo pa nga pumayag akong mapako sa Krus

Para mabuhay ka.

IV

Nang sinabi ko ‘yan sa’yo ay natulala ka

At unti-unting pumatak ang masagana mong luha

Sa pagkakataong ‘yan ay niyakap kita

At sinabing ‘wag mo akong kakalimutan

Sana maalala mo ako saan ka man magpunta.

V

Ilang beses rin tayong nagtagpo

Ilang beses ko ring na-enjoy ang mga ngiti mo

Ilang beses ka ring kumuha ng selfie sating tagpuan

Napakasaya ko talaga kapag kasama kita

At alam kong ganoon ka din kapag kasama ako.

VI

Lumipas ang ilang mga buwan

Di na kita nakita sating tagpuan

Di ko alam kung may nasabi ako

Na ikinasugat ng puso mo

Pero ang alam ko naging perpekto ang pag-ibig ko.

VII

Sa sobrang pagka-miss ko sa’yo gumamit ako ng tao

Para i-post to sa social sites at baka sakaling makita mo

Gusto kitang lapitan at yakapin

Para malaman mong hanggang ngayon

Mahal na mahal pa rin kita.

VIII

Hindi ko ito nasabi sa’yo noon

Kaya ngayon sasabihin ko na

Hindi lang kita tinuring na kaibigan

Itinuring pa kitang isang tunay na kapatid

At isang tunay na anak.

IX

Sana magawa pa nating ibalik ang lahat-lahat sa dati.

Kaya natin ito. Magtiwala ka sa’kin, nagtitiwala ako sa’yo.

Nandito lang ako, naghihintay sa’yo.

Nagmamahal,

Panginoong Hesu-Cristo.

“When somebody I love hurts me, or when I realize I hurt someone who loves me, I just imagine how God feels each time we hurt him.”

cabreraflorina.blogspot.com