KATIWALA NG KABUTIHAN

Bilang mabubuting katiwala… ng Dios, gamitin ninyo ang kakayahang tinanggap ninyo sa ikakapakinabang ng lahat.

1 Pedro 4:10

Nitong nakaraang linggo, nagkaroon ako ng mga pagkakataon na magpakita ng kabutihan sa iba. Sa isang sitwasyon, sa halip na magalit, ito lang ang aking itinugon, “Okay lang iyon. Lahat naman tayo ay nagkakamali.”

Napakabait ko! Para sa akin napakabuti ng aking ginawa, kahit hindi ito perpekto. Naisip ko na dahil mabait ako, dapat ganito rin ang gawing pagtrato sa akin ng iba.

Noong Linggo, inawit naming ang “Amazing Grace” (kamanghamanghang biyaya.) Dahil sa mensahe ng unang dalawang linya ng awit, naisip ko na hindi tama ang aking saloobin tungkol sa pagiging mabuti.

Maling-mali ako! Ang totoo, kaya ako nakagawa ng kabutihan ay hindi dahil sa mabuti ako kundi dahil sa kabutihang ipinadama ng Dios sa akin. Nakakapagpakita tayo ng kabutihan sa iba dahil ibinigay ito ng Dios sa atin. Kaya mabuting ipadama natin ito sa iba.

Sinabi ni Pedro na apostol ni Jesus, “Bilang mabubuting katiwala ng iba’t ibang kaloob ng Dios, gamitin ninyo ang kakayahang tinanggap ninyo sa ikakapakinabang ng lahat” (1 Pedro 4:10.) Bilang mabuting katiwala ng Dios, palagi tayong maghanap ng pagkakataong maibahagi sa iba ang anumang ipinagkaloob ng Dios sa atin.

Isinulat ni: Julie A. Link      

“Ang pag-ibig ng Dios ay wagas,

Sa Krus Niya ito ipinamalas,

Kabutihan Niya’y isasaysay,

Nang ibuwis Niya ang Kanyang buhay.”

KUNG NARANASAN MO ANG KABUTIHAN NG DIOS, IPAPADAMA MO RIN ITO SA IBA.