MAGANDANG BALITA

Nakita nilang naigulong na ang bato mula sa libingan… nang sila’y pumasok ay hindi nila nakita ang bangkay.

-Lucas 24:2-3

Ayon sa isang pag-aaral na ginawa sa Amerika, mas naaalala ng mga tao ang masasamang pangyayari kaysa sa mabubuti. Ipinapakita sa pag-aaral na ito na kahit sinasabi ng marami na ayaw nilang makarinig ng mga pangit na balita, napagtutuunan pa rin nila ng pansin ang mga balita tungkol sa sakuna, trahedya, mga sakit, at iba pa.

May isang babae noon na mas interesado sa ‘Magandang Balita.’ Catherine Hankey ang kanyang pangalan. Noong 1866, nagkaroon siya ng malubhang sakit. Habang nakaratay, iniisip niya ang mga taong nabahaginan niya ng magandang balita ng kaligtasan. Ninanais rin niyang may mag-ulit sa kanya ng ‘lumang kasaysayan’ ni Cristo na isang magandang balita. Sa mga panahong ito, isinulat niya ang isang tula na naging awit, “Tell me the Old, Old Story’ (Ang Lumang Kasaysayan.)

“Isalaysay mo nang marahan nang lubos kong mapagnilayan,

Na sa ating kasalanan, Siya ang ating katubusan;

Isalaysay nang paulit-ulit nang sa isipa’y ‘di mawaglit,

‘Di matulad sa hamog na naglalaho sa isang saglit.”

Hindi natin pinagsasawaang pakinggan ang ‘Lumang Kasaysayan’ na dahil sa pag-ibig ng Dios sa atin, isinugo Niya si Jesus. Dinala Niya ang ating mga kasalanan, ipinako sa Krus at muling nabuhay. Kung sasampalataya tayo sa Panginoong Jesus, ituturing tayo ng Dios na mga anak Niya (Juan 1:12.) Ibalita mo sa iba ang tungkol kay Cristo at ang Kanyang pag-ibig. Kailangan nila ang Magandang Balita.

Isinulat ni: A. Cetas

ANG MAGANDANG BALITA NI CRISTO ANG PINAKAMAGANDANG BALITA SA MUNDO.