ANG KAPANGYARIHAN NG ATING LIMITASYON

Ngayon ay humayo ka, Ako’y sasaiyong bibig at ituturo ko sa Iyo kung ano ang Iyong sasabihin.

-Exodo 4:12

Si Moises, nang tawagin ng Diyos ay maraming idinahilan, “O Panginoon, ako ay hindi mahusay magsalita, mula pa noon o kahit mula pa nang magsalita ka sa Iyong lingkod, sapagkat makupad akong magsalita at umid ang dila” (Exodo 4:10).

Nagpapahiwatig ito na si Moises ay may depekto sa pagsasalita, maaaring nauutal siya. Ngunit sinabi ng Dios sa kanya, “Sinong gumagawa ng pipi o bingi, o may paningin o bulag sa tao? Hindi ba Akong Panginoon?” (t.11).

Hindi aksidente ang ating depekto o kapansanan. Disenyo iyan ng Dios. Ginagamit Niya ang bawat isa sa depekto natin para Kanyang kaluwalhatian. Ang paraan ng Dios sa pakikitungo sa ating mga “limitasyon” ay hindi alisin ang mga ito kundi bigyang kalakasan at gamitin sa ikabubuti.

Sa Bagong Tipan, binanggit na si Pablo ay may depekto o sakit na hindi tinukoy kung ano – tinawag niya na “tinik sa laman.” Ilang beses niyang hiniling sa Dios na alisin ito (2 Corinto 12:7-8). Ngunit sabi ng Dios, “Ang Aking biyaya ay sapat na sa iyo sapagkat ang Aking kapangyarihan ay nagiging sakdal sa kahinaan” (t.9).

Natutunan ni Pablong magalak sa kanyang kahinaan upang ang kapangyarihan ni Cristo ay manatili “sa kanya” (t.9), sapagkat “kapag ako’y (Pablo) mahina ako nga’y malakas (t.10).

By: David Roper

“Mga tapat at banal na kasama ang Dios

Kahit mahihina, sa Salita Niya’y tiwala’y lubos;

Pasakit at luha sila rin ay inaabot

Ngunit napagtatagumpayan lahat ng kanilang takot.”

ANG LAKAS NG DIOS AY PINAKAKITANG-KITA SA ATING KAHINAAN.