CHRIST'S LETTER

Anak,

Ako ay labis na nagagalak

Sa tulang ginawa mo para sa akin,

Dahil dito ay aking ipinapangako

Na ika’y paliligayahin habang ika’y nabubuhay.

Huwag kang matakot, Ako’y sasaiyo

Hindi dapat mangamba ‘pagkat ang Dios mo’y Ako,

Palalakasin Kita, tutulungan at hahawakan

Ng Aking mga kamay na makapangyarihan.

Kung ang Salita Ko ay iyong iniibig

Paglagong espirituwal iyong matatamasa

At kung sa puso mo ito’y laging iingatan,

Pupuspusin ka nito ng tunay na kagalakan.

Maraming taon ang nakalipas nang ika’y nagdesisyon;

Iyong ipinasyang sumunod sa Akin;

Mula noon ay Ako na ang sumubaybay

Sa daang tinatahak mo sa iyong buhay.

Kung mga pagsubok ay iyong mararanasan,

Ako ang dapat mong pagtiwalaan;

Ipapamalas Ko ang Aking kabutihan,

Ang sa Aki’y susunod ‘di Ko iiwan.

Ang panahon ay pabagu-bago

Gayundin ang buhay ng tao,

Masama man ang takbo ng mundo,

May dakilang plano Ako para sa iyo.

Ang paglilingkod mo sa Akin,

Maaaring ‘di mapansin ang mga iyon,

Pero pagharap mo sa Akin,

Malaking gantimpala ang iyong matatanggap.

Ang pag-ibig Ko sa iyo’y walang-hanggan

‘Di tayo mapaghihiwalay ng kahit sinuman;

Buhay ko ay inialay para ika’y tubusin,

Kaya ikaw ngayo’y pag-aari ko na.

Ako ang nararapat mong lapitan,

Kapag nalulungkot at nasasaktan;

Gabay at lakas ikaw ay bibigyan,

Mayroon pang dagdag na kapayapaan.

Akong Panginoon mo ay totoong kaibigan;

Anumang problema Ako’y mapaghihingahan,;

Mga sulirani’y sa Aki’y idalangin,

Tutulungan Kita sa iyong pasanin.

Habang tinatahak mo ang buhay na ito,

Araw-araw ay lagi Kitang sinasamahan,

Bagamat paliku-liko ang iyong dinadaanan,

‘Di ka maliligaw hindi Kita iiwan.

Sa iyong takbuhin sa pagganap ng Aking kalooban,

Pagsusumikap at pagpupunyagi ay ibigay nang todo;

Pasisiglahin ka ng katotohanang ito,

Na ang iyong panalo ay “Para kay Cristo!”

Para sa AKIN.

Nagmamahal,

Panginoong Hesu-Cristo.