SINO PO SILA?

Sumunod kayo sa Akin at gagawin ko kayong mga mamamalakaya ng mga tao.

-Mateo 4:19

Kung pupunta ka sa isang bahay ng hindi mo kakilala at tanungin ka ng, “Sino po sila?” maaaring ganito ang isasagot mo, “Tubero po” o “Guro po ng anak ninyo.” Pero hindi ikaw iyan. Trabaho mo iyon. Paano kung wala kang trabaho? Paano mo ipapakilala ang iyong sarili?

Sino ba talaga tayo? Kung nagtiwala na tayo sa Panginoong Jesus, tayo’y mga tagasunod Niya. Tingnan natin si Mateo. Dati siyang sakim na maniningil ng buwis. Pero nang sabihan ni Jesus na sumunod siya sa Kanya, nagbago si Mateo (Mateo 9:9.) Nakilala na siya bilang tagasunod ni Jesus. Nangyari din ito kina Pedro, Andres, Santiago at Juan nang iwan nila ang kanilang mga lambat at sumunod kay Jesus (4:18-25.)

Maraming tao ang naakay ni Jesus para maging tagasunod Niya at hanggang ngayon ay naghahanap pa rin Siya ng magiging mga tagasunod Niya. Sa gayon, magkakaroon ng halaga at magandang layunin ang ating buhay. Hindi natin kailangang iwan ang ating mga trabaho para maging tagasunod Niya. Ang dapat nating gawin ay mamuhay nang naaayon sa Kanyang kalooban.

Kung may magtatanong sa iyo kung sino ka, sana ganito ang maisasagot mo: “Tagasunod po ako ni Cristo!”

-Joe Stowell

“Aking Panginoon, ako po ay tulungan,

Na sa bawat araw ay aking matutunan,

Na makapagbigay ng lugod sa Inyo

Ito ang dapat na maging hangarin ko.”

KUNG MAGPAPAKILALA ANG ISANG MANANAMPALATAYA, SAPAT NA SABIHING TAGASUNOD SIYA NI CRISTO.